Skip to content

LOS NUESTROS PILOTOS

Miguel Ángel Méndez Pérez

Natural de Navia, ye Doctor en Ciencies del Deporte y, anguaño, profesor d’Educación Física nel IES Carmen y Severo Ochoa en Ḷḷuarca. Ye prácticamente habitual en deportes como’l senderismu, la bici de monte o’l running. Tien superao varios desafíos personales, como varios 3.000 en monte (Dolomitas), el descensu a nalu la ría Navia (5.000 metros), la maratón de Madrid (42.195 metros) o la ruta 40 en 4x4 dende San Martín de los Andes hasta Ushuaia (4.900).

IMG_20191121_234003

Marcelo Gustavo Rodriguez

FOTO MARCELO

Marcelo Gustavo Rodriguez

Banqueru de profesión. Dende que retiró como Direutor Xeneral de Recursos Humanos nel Bancu de Tierra del Fuego n’Arxentina, compaxina la so axenda familiar con viaxes per tol mundu. La so mayor afición ye la pesca, que combina con viaxes de grandes trayeutos que fai n’autocaravana y/o avión davezu. Ente los sos desafíos, ta la travesía en Kayak Lago Puelo (cruciando d’Arxentina a Chile), xubida a la base’l Fiz Roy (Chaltén), senderismu pa cruciar el glaciar Perito Moreno (14 km) con crampones y Ruta 4x4 dende San Martín de los Andes hasta Ushuaia.

VINCULACIÓN COL MUNICIPIU DE VALDÉS

luarca

Los dos pilotos tienen una especial vinculación col municipiu de Valdés. Dambos tienen una descendencia común en Ḷḷuarca; y ye que les sos güeles yeren naturales d’esti municipiu. Marcelo, que ye español y arxentinu tamién, desciende d’una familia que vivía en Ḷḷuarca; en concreto, nel conocíu barriu’l Cambaral. Ellí críose’l pá, Valentín, que dende bien mozu emigró p’Arxentina a buscar fortuna colos padres. Pero dicen que los emigrantes nun pasen un minutu ensin alcordase de la tierra, y d’esa manera creció Marcelo; coles histories de la güela y del padre, que de contino-y recordaben lo guapo y lo especial d’aquel puertu mar, qu’aseñaldaben dende la gran capital porteña, dixebraes por un escomanáu océanu Atlánticu. Estes vivencies marcaron la personalidá de Marcelo, que dende que la güela finó, enfotárese en conocer los sos raigaños y vincular con Asturies, viaxando añu tres d’añu tolos branos dende aquella.

Miguel, pela so parte, ye natural de Navia, pero tola familia materna ye de Ḷḷuarca; la madre estudió nel IES “Carmen y Severo Ochoa”, sitiu nel qu’él tien la plaza profesor. Los güelos yeren d’Outur (Constante) y de Villuir; Santiago (Abelina), la güela, al empar, yera hermana de Carmina, casada con Ramón, que son los emigrantes güelos de Marcelo.

luarca 2

Tanto Marcelo como Miguel conociéronse pola vinculación coles sos families, y bien ceo, la compatibilidá de carauteres fexolos correr varies aventures xuntos, amás de munchos kilómetros en coche (Rumanía, Alemaña, Italia, Austria, Suecia, Dinamarca); fixeron y completaron con ésitu la ruta 40 en mou 4x4 (Pick Up Toyota Hilux), que foron unos 5.000 kilómetros dende la frontera andina con Bolivia hasta la mesma fin del mundu n’Ushuaia. Esta ruta ye un emblema les rutes 4x4, yá que ye la más llarga’l continente llatinoamericanu, atravesándolu de sur a norte, y percuerre varies de les rexones turístiques y los atractivos más importantes del so territoriu. La ruta principia en Santa Cruz, atraviesa 21 parques nacionales, 18 importantes ríos, coneuta 27 pasos elevaos y esguila a cuasi 5.000 metros perriba’l nivel la mar, en concreto, en Salta, convirtiéndola na ruta más alta d’América, y tamién la más alta’l mundu fuera de la carretera los Himalayes.

Agora, gracies a la oportunidá que-yos brinda’l Departamentu d’Automoción del IES Carmen y Severo Ochoa, puen volver axuntase pa, esta vez, ponese a prueba en desiertu.